المشاركات
______________________________
اليومين دول
جى على بالى
بيتنا القديم والطين
اللى ناشع من ساسه
ريحته بالظبط زى ريحتها
كأنهم عاشقين بعض..
تقول بتشتهى الفرح
لما تسمع زغروده
او حد يقول للتانى مبروك
على طول تقولى عقبال عندك..
لما كانت تفتح عنيها
تلاقينى واقف أدمها
ببص عليها
تقولى.. خير صباحين
الله يسهلك..
دعوه تهز الروح
وتخلى كل دمعه تنزل
على الخد تحضن ضحكه
وشها للسما..
رحمه ونور..
يومها كان احساسى
ان النجوم ملايكه
ماشيه فى جنازة امى
اللى الحزن ياما كان
غموسها ولقمتها
والضلمه هدمتها..
لما تضايق تقرأ الفاتحه
اللى محليتهاش غيرها..
ليلة وفاتها بصت لى وقالت لى
على طول يا ابنى
حابس دمعتك وفرحتك
ليلتها شفت القمر
كف مرسوم جوه منه ميزان..
الميزان بيتمرجح
كفتينه جوه كل واحده
روح بيبصوا علينا
مسكت ايدى بايدها الدافيه
المرعوشه
وعنيها مليانه بياض
قالت لى .. انا مروحه..
افتكرت وقتها امى
لما كانت تضرب على الطار
فى افراح العيله وهى بتغنى
(يختى مالك تخينه
اياك جوزك عسكرى
البنت بيضه وحمره
وخدودها شهد وسكرى)
شهقت وادحرجت على خدى
دمعه بارده
وضحكه ماتت على الشفايف ..
دلوقتى وانا بفتكر نظراتها
اللى حوشتها لعوزه
وحاجات كتير روحت
زى ما تكون لملمت كل حاجه
وخدتها ....
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم