عاشور الزعيم@@@آدى السهر سهران

عاشور الزعيم

***الكل فى الصوره مادد ايديه***
__________________________________________
آدى السهر سهران
والليل سكن غيته
اللى ما طبطبش على روحه
وسكّت عويل جروحه
مين فى الدنيا يستاهل
تبكى على روحه
مدام الحب مش نافع
النفس من الجوف مش طالع
والخنقه ماسكه الكل
ازاى يا حزين هتفّرق
ما بين الورد والفل
انا ما بين الهم والوهم ساكن
واخد السكه مشواير
عارف حدود خطوتى
قافل بيبان لهفتى
لجل ما تفضل الروح حاضنه الدموع
لجل شوقى ما يغلبنيش
واتوه فى زحمة عتمه
وسكه منهاش رجوع
فهمانى ولا لسه الشرح
ما هوش وافى
لسه التلج معشش فى قلبك الدافى
وعلى الشفتين ضحكه
خايفه يخونها قمر مخنوق
سهران ليلاتى
مستنى نجمايه عاشقها
فى الربيع اللى فات
وادينى مستنى يهلّ ويا الشوق
روحك الطاهره
والملايكه بتزفها وتحفها
بنور اتوضى منه
لجل العيون ما تشوفش غيرك
سعاد اللى الليل مصاحبها
والعتمه مخاويها
شايفها انا من زمن مريم
ورابعه والحاضرين وياها
الكل فى الصوره مادد ايديه
حسنه لله يا محبين الغرام
دمعه فرّت من عنيها
سكنت مدتة الجامع الازهر
وانا يا ام الصابرين
ما بين المداحين والذاكرين
والهايمين فى حبه حابب
روحى يا روح منوره ومصهلله
اكتبى للغايب يعود
الليل مهما يطول له حدود
وبكره تيجى فارده فوق الكل
شمسيتك
نازحه من جوه القلوب الحزن
عاشقه ملامح لسه ما اتخلقتش
ما تدوريش جوه البطون
يمكن تكون مش من البشر
انا بس عايزك تهدى
تصلى على جد الحسين
فتة النابت اكله مبروكه وسط المقام
ريحة الاوليا والعطر اللى زاحم
نفس الملهوفين
عارفه هناك المكان براح
التعبان والشقيان والمخنوق
اللى شايل هموم الخلق
الكل هناك بيرتاح
بيغسل من الوجع قلبه
يناجى فى مرواح الروح ربه
نكتب على حيطان النفس
بكره الروح ترتاح .

شاركها في جوجل+

عن Unknown