خالد الكردى @@@@عريس لبنتي

خالد الكردى

اصدقائي الاعزاء 
مازلنا في تقديم روائع الزمن الجميل وسلسله للحوار بيني وبين الشاعره
الراقيه الاستاذه ميرفت حموده
عريس لبنتي كلمات
الشاعره ميرفت حموده والشاعر خالد الكردي
عريس لبنتي
----------
خالد الكردي
لما جاللي عريس لبنتي
قولت اروح واسال عليه
اصله جاني وقاللي شاري
والغرام باين عليه
قولت اسال بنتي قابله
ف اللي يوم يدخل حياتها
لو موافقه هاقول شروطي
ف اللي راح يصبح شريكها
------------------------------
ميرفت حموده
اللي شايفه انت يابابا
هو صاحب قلب طيب
وان وافقت هاكون سعيده
والبعيد يصبح قريب
--------------------------
خالد الكردي
يابنتي بيقول دخله بسيط
وحاجاته جايه بالتقسيط
اخاف اوافق اظلمك
واخاف لايطلع بكره حويط
---------------------
ميرفت حموده
الفلوس مش كل حاجه
قلبه مليان بالحنان
خطوه خطوه نعيش ونرضي
والحياه تبقي ف امان
---------------------------
خالد الكردي
الفلوس دي شيء ضروري
هي اكسير الحياه
بس هيكون من شروطي
يبقي ليكي طوق نجاه
------------------------------
ميرفت حموده
هو لسه ف البدايه
والحياه مشوار طويل
بكره يكبر يبقي حاجه
خوفك انت مالوش دليل
---------------------------
خالد الكردي
الحياه ابيض واسود
متغيره ف كل يوم
نفسي اشوفك حاجه حلوه
ومتعيشيش جوه الهموم
------------------------
ميرفت حموده
حاسه انا بخوفك علية
بس الفلوس ممكن تروح
وابقي انا ف يوم الضحيه
وقلبي قتلاه الجروح
------------------------
خالد الكردي
بصي طب لبنت خالتك
لما ساءت الاختيار
لما جيه بالحب وحده
بعدها عاشت ف نار
-----------------------------
ميرفت حموده
مش زمان قالوا ف كلامهم
لوبتاخده يوم فقير
ربنا يغنينا دايما
والغني نغي الضمير
-----------------------
خالد الكردي
حكمي عقلك وقلبك
قبل ماتاخدي القرار
ف انتظار ردك يابنتي
نفسي اشوفك ف اذدهار
----------------------------
ميرفت حموده
نفسي اخد فرصه منك
نفسي اجرب اختياري
وان فشلت يبقي غلطي
وراح اتحمل قراري
-------------------
خالد الكردي
يعني اوافق لو تحبي
وانتي شايفه دي حياتك
بادعي انا من جوه قلبي
يسعدك واشوف ولادك

شاركها في جوجل+

عن Unknown