المشاركات
اطرد الحيره والقلق
اكتب على السما بعنيك يارب..
لازمن تعرف يا صاحبى
ان الورقه الصفرا تقع مع اول نسمة هوى
وانك لازم تبقى طبيعى
وتاخد الامور ببساطه
ماهى اول اما تعدّى تلاقى نفسك بتضحك
بتبص فى ساعتك وتقول فى الميعاد بالظبط
الضحكه اللى محوشاها من امبارح
مستنيه عشان تضحكها
اول لما تشوفك قاعد مستنيها
البصه اللى بتملى الجو آهات وبتدوخنى
بتخلينى انسى انى بقالى وقت طويل
بفكر انى اطردها زى نفس دخان
طالع بيرسم فى الجو حاجات ملهاش زى
الحاجه الوحيده اللى بتشبهنى
قصيده كتبتها عنى
وشفتنى وانا بستنى الصبر
ياخدنى فى سكه انا اولها..
اما عنيا تنام وقت زحمة كوابيس
الاقى الشوق بيخاف ويقول لى انى مرعب
وان الخضه بتطيّر كل حلم ممكن تيجى فيه..
ليلة امبارح شفت ان دماغى متعلقه على باب الاوضه
وجسمى عمال يتمطوح زى عرايس المولد
لما سألت الراجل البايخ اللى بيعدّى
ويبصلى ويضحك برضوا بص وضحك وبعد شويه
لقيته جى يقول لى هى لسه معدتش...
انا فعلا تعبان ومحتاج للراحه
يااااااااااااااااااااااااااااااه
نفسى انام كام ليله لحد اما الخنقه
اللى متبته فى روحى تزهق وتطفش..
جبار يا النفس الطالع من حلق مرّر
وجوف مسكاه التوهه
وعيون مش صابره على الوقت اما يعدّى
جايب معاه ضحكتها..
يا دوب ألحق ألملم مشابك الحزن المنشور
على بوابة القلب..
ألبس ضحكتى المتخبيه بقلها زمن
اللى قدمت من كتر منا سايبها
وماشى ادور على روحى..
فكرت وانا خارج اكتب على باب البيت
راجع ومعايا حببتى
يمكن ألاقى زغروده مستنيه قدام البيت..
عن Unknown
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم