على فرج @@@‏عشاق تراب مصر‏

 ‏علي فرج‏ 

 ‏عشاق تراب مصر‏ 

الجمعة 22 أغسطس 2014م
مصر عروسه !!
ـــــــــــــــــــــــــ
مصر عروسه !!
بس يا عيني في يوم دُخلتها 
زرعوا الضلمه ف وسط الكوشه
والمعازيم من كتر الزحمة
داسوا ف بعض وبقيت حوسه
اللي تشدها من فستانها
واللي بتقعد هيا مكانها
واللي يشد بإيده الطرحه
حتى شعورها بقت منكوشه !
سرقوا الطرحة
وخطفوا الفرحه
ضلِّموا ليلة أحلى عروسة !!!
مش معازيم !
مين اللي عزمهم ؟
لأ يا خونّا دي ناس مدسوسه
جيّه تخرب ليلة الزفّه
جُم يتشفّوا ف أحلى عروسه
خلوا الدمعة مكان الفرحه
وخلوا اللطمه مكان البوسه !!

قومي يا غالية سلامة عمرك
قومي تغور ميت ليلة وكوشة
قومي تعالي ف حضن حبايبك
عزالنا هتفضل مفروسة
نار بتاكلهم جوه قلوبهم
لما لقوكي بقيتي عروسه
وحياتك لهفرّح قلبك
وراح اعمللك أجمل كوشة
حالف لارقصلك وأغني
مهما تكون الناس مفروسه
وحياتك منا سايب طارك
وهترجعي من تاني عروسه
يملا النور ليلك ونهارك
والكل يقول مصر عروسه ....
ــــــــــــــــــــــــــ
علي فرج

إلغاء إعجابي

شاركها في جوجل+

عن Unknown