المشاركات
""صيد الحروف"" كلمات / محمود وحيد
بالٍف الشوارع
أدقق واشوف
وجوة عيون
الغلابة باطوف
أسجل مواجع
وأراقب قلوب
وأدون بقلمى
ألام الحروف
شوارع بلادنا
ملانا عــبرَ
وفيها حكاوى
تبَكٍى الحجـر
قصايد وكل شطورها
هموم
بتحكى المواجع
بكل الصور
ما بين اللى مرمى
وفارش رصيف
وغيره اللى حافى
وجيبه نضيف
وست عجوزة
تأكٍل يتامى
فى سلة زبالة
تجيب الرغيف
وحبة كهــــول
فى صيف أو شـتا
يا دوب هى هدمة
لبرد ودفــــا
يمدوا الأيـــادى
بقصد السؤال
وعينهم بتشكى
لرب السما
وعاطل ما لاقى
لشهادته مكان
علامُه ما فاده
كأنه ما كان
نهاره ينامه
بطوله ما يصحى
وليله بيسهر
يناجى الحيطان
بيكبر وسنه
بيسبق زمانه
ويعجز بهمه
وقبل أوانه
فيسرح بفكرُه
وعقله يسافر
ويرجع بفكرَََة
زرعها شيطانه
يبلطج ويسرق
ويقطع طريق
وينهب ويحرق
ويقتل صديق
ولما تقوله
كفاية يقولك
طريقى ومشيته
ما عدتش أطيق
وفوق المجارى
تلاقى بيوت
بتشرب بلاوى
وتاكل فى موت
جسدهم بيصرخ
ومين اللى يسمع
مادامت ضماير
قلوبنا فى سكوت
وكام طفل سارح
يلقًط فى عيشه
وكل الخلايق
بتنتف فى ريشه
براءته الجميله
فى سجن الهموم
وساعة ما يزهق
بيقلب حبيشة
وياااه ع اللى داير
بيشحت دواه
وحفيت كعوبــه
وتاهت خطاه
يروح المشـافى
بعلة فى جسده
فيرجع وجسـده
ما عادش معاه
خانوه الأطبــه
وسرقوا البقيــة
وتاجروا فى صحيحه
وباعوا القضيــة
عليلك يا بلـــدى
فى سوق العبيد
بيدفع حياتــــه
بحقنة وريــد
يسافر معاهــــا
ولما يفـــوق
يحسس فى كبده
فيلقاه بعيــــد
وناس تانية خالص
وعكس اللى فات
حياتها مصايف
ورقص وصاجات
بتلبس حرير
وتسكن قصور
وفوق الخلايق
بتنسج أهات
وقصة وحكاية
وقصيدة وديوان
لشارع وحارة
وصرخة غيطان
حكاوى الغلابة
بتطرح مأسى
ويشهد عليها
اله الزمان
25/9/2014
عن Unknown
شكرا لكم القائمون على إدارة " عزف على أوتار الحروف" خالص مودتى وتقديرى
ردحذف