Mohammed Abu El-Fath@@@موااال

Mohammed Abu El-Fath

مــــــــــــوال
أول ما نبدأ قول حنصلى علي الغالي
طه النبى العدنان أ بو المقام عالي
وعلي الربابه حأقول وأغنى موالى
بس بلحن حزين يحكيلكوا عن حالى
أنا كنت راضى ياخى والقلب كان خالي
العمر ياصاحبى ضاع وهو راس مالي
حكم القدر راضى وتصريفه أحوالي
أنا ووحدتى نبات بنغنى ألحانى
ونشكى من الأيام وغدرها الجانى
وفى غفلة الأيام طيف الحبيب جالى
الدمع منى جرى يبعت له مرسالى
قاللوا القلب بكى إرجع لي يا غالي
رد الحبيب بالجفا وقالوا وأنا مالي
حزنك عليك انكتب خلينى انا فى حالى
إنت زمانك مضى وأنا عمرى ده حلالى
خليك كسير القلب وحاعيش أنا دلالي
ألعب مع الأيام وعيونى بفرحها تلالى
رديت بدمعى عليه جاوب علي سؤالى
هى القلوب عندكم ياناس كده تسالي
أدعى عليك تعيش الغرام وتغنى موالى
وتعيش بدمع الندم يا خى وتلالي
ماتلقى غير البكى وقلبك يبات خالي
يبقى حالك يا خل زى كده حالي
محمد ابو الفتح

إلغاء إعجابي

شاركها في جوجل+

عن Unknown