عاشور الزعيم

*** عيونك ونس ***
____________________
لمّا
بنوى السفر
اعمل شفايفك ناى
عيون القلب شوّاقه
دموع الفُرقه حرّاقه
صوتك ربيع جاى
لمّا
بنوى السفر
اعمل شفايفك ناى...
**
لمّا
بنسلخ منك
بحس بصحرتك فيا
عُمرى خضَار يابس
بحسك شمعه مطفيه
وردة خريف يائس
اشتهى غابك الغوّاى
اعمل شفايفك ناى..
**
ملامحى
ف غربتك توهه
اراضى الغربه معتوهه
بحبك لو حنانك شوك
لو قلبك م الهموم مسكوك
لو حلمك صحيح نسّاى
تعلا صرختك جواى
اعمل شفايفك ناى ...
**
اما تبقى الدنيا تمسّى
ليلها يغرق ف الغيوم
اما كل الناس تنام
واللى صاحى عمّال يفكر
امتى هيسرق السلام
من ورا سلك شباكك
والنوم يداعب ف الجفون
اهمسيلى فهمينى
اكون حبيبك او لا اكون...
**
اما
شمس بكره تيجى
نورها يودّع اشباحه
الوطن ألقاه فى طريقى
شايل ضل فرح بجناحه
اما
جروح الكون ترحل
والفجر من ضحكتك يخجل
افتحى فى النور شباكك
اخلصى من جرح سُكاتك
قولى انك تبقى ليلى
وانا
موافق اكون مجنون ...
اهمسيلى فهمينى
انا
الضمّه ولا انا يدوب
سكون.....

شاركها في جوجل+

عن الشاعر أشرف الهنداوى