عاشور الزعيم..........................................*** حكاية عاشق***

عاشور الزعيم

*** حكاية عاشق***
_____________________________
القلب كان بفته بيضا
والعين ما دمعتشى
الروح كانت صافيه
بالفكر ما انشغلتشى
الحزن ما عدّاش علينا
والمره يا قلبى ما انكتبتشى
ع الحال دا كان العمر
حكايه ما انقالتيشى
وف يوم جتنى صبيه متحنيه
والفرح ف عنيها
فارده ع الكتاف جدايلها
والسعد باين عليها
عيون بالرضا متبسمه
والرموش حرّاس بتحميها
شفايف ورد همسالى
وخدود عناب حواليها
قوام غزلان صادنى
وحيّر عيونى معانيها
قالت لى ليه العجب
وحياتك انا العجب فيها
انت النصيب يا نصيبى
من بين الخلق ومن فيها
دق القلب دقاته
وقال لى مجربتش
يا صاحبى العشق
هات لى العشق هاته
خدتها وف العالى جنب البلابل
بنيت عشها
وصيت القمر يسليها
جبت درويش يا خلق
يرقينى ويرقيها
طلع الدرويش غواها
بكلمه مشيت وراه
وقالت لى روح يا عم
ينجّيك من الدنيا وبلاويها ....

شاركها في جوجل+

عن Unknown