عاشور الزعيم@@@* قلب كان مستنى يحب

عاشور الزعيم

*** قلب كان مستنى يحب***
___________________________________
اسكنى القلب الفراغ
فى الفراغ
ارسمى وش من غير شفايف
حاولى تشوفى من عنين
الوش المرسوم ايه اللى
جى من يمة القدر
يا ريت تقدرى تقررى...
انا ما اخدتش قلب من صاحبه
ولا عمرى شفت نفسى
جواه..
ولا نط يوم وساب صاحبه
وجه يصالحنى ..
انا لسه يا دوب بفتح طاقته
بكتب على حيطانه سكن للبيع
مقفول بقى له زمن
والضلمه يا ما خدت منه راقات
قسمت جواه حدود وعملت هويه
لعشاق العتمه..
الليل كان سلطان على قلبى
جايب كل كلاب السكك تنهش
فى الحته البيضا اللى رافضه
تكون تشبه له..
عرفتى ليه الدرويش الوحيد
قايد شمعه وسط ليالى العتمه
اللى متسلطنه جوايا
عشان مستنى تسكنى الحته الفراغ
اللى باقيه ومحدش خد باله منها..
انا ما اخترتش قلبى ولا لونه
ولا مين يسكنه ولا مين يجرح احاسيسه
من يوم ما سكنى وكبر جوايا
وانا بستنى لحظة عشق تنور عتمة
عمر اتسرسب شاب وسط المولد
اللى مالوش صاحب..
انا وقلبى زى طاحونه
دايره على الفاضى تاكل بعضها
زى نجوم السما بتنور
وما ينبوها الا السهر
الفضا اللى جوه القلب فيه الصوت بيرن
زى بيت مهجور بتسكنه العفاريت
انتى سكوتك عامل ازمه ومخلى الروح
تملى تقول لى ايه اللى
جابنى معاك..
انا هاكتب يافته على كل عيون الخلق
مكتوب عليها
قلب كان مستنى يحب ...

شاركها في جوجل+

عن Unknown