عاشور الزعيم,,,,,,,,,,,** بواقى وجع فى القلب

عاشور الزعيم

*** بواقى وجع فى القلب***
________________________________________
عارفه انك شىء ما حصلش
ان كل بنات الدنيا
مش اجمل من لحظة ابص فيها
لعنيكى وبين الرموش اسرارك
اللى تملى بتداريها..
ياااااااااااااااااااه
محتاج فنجان قهوه يفكرنى
بانك لما بتمشى
الشمس بتمشى وراكى
والاه اللى بتقع منى على الاسلفت
بتدهوسها الناس مش عارفين
انها بواقى الوجع اللى فى قلبى..
مع انى مش لاقى تفسير
لكلامى اللى بيهرب ويروح
للشارع وسط الزحمه..
وليه احساسك ان كل الناس بتبص علينا
مع اننا فى العادى
تربيزه وكرسيين وحاجه ساقعه
تطرى على القلب اللى ياما
شال جواه حزن وفرح..
هو نفس المكان بتاع الصميت والجبنه القريش
والمراكبى اللى مستنى ياخدنا رحله
واحنا عاملين مش واخدين بالنا..
انتى الليله فى حاله جديده
الشوق فيها بينط من عيون مليانه حواديت
السمك اللى بيلعب فى الميه
ماشى بشويش زى ما يكون مستنى
يسمع حدوتة جديده
انا شايف عنيكى محتاره اكمنها مشتاقه
تقول لى اللى محيرها
خليكى عادى اكنك بتحكى مع مرايتك
ساعتها قالت لى انى شىء ما حصلش
وان الموت اللى كابس على روحها
بيطفش لما تشوفنى
زى ما اكون حلم لسه المطر اللى بيرويه منزلش
او سكه مشينا فيها وما كملتش
آآآآآآآآآآآآآآآآآآآآآآآآآآآآآآآآه
على الوجع اللى مُصر انه يقلقنى وما يهمدش
مع ان لسه محوش نظره ليها
تهد الحيل وتخلى الواحد ينام وبغير عنيها ما يحلمش
واهو بكره جى وهتحكيلى انى شىء محصلش

شاركها في جوجل+

عن Unknown