عاشور الزعيم ‏@@@***مش لاقيين حدود للفرح*

عاشور الزعيم

‏

***مش لاقيين حدود للفرح***
_________________________________
الله على الايام المفترجه دى
والارواح هايمه ومتشعلقه فى الذكروالتوحيد
انت وحيد بين دموعك وذنوب بتتمحى...
انا بينى وبينك يا دوب سجادة صلاة مربعه
وحدود على الارض متربعه وامين اللى بتهز
مشاعر الناس الهايمه فى حبه...
الله يا صاحبى لما تكون فى الجامع
وتسمع صوت الناس اللى بتقرأ القرآن
الايدين المرفوعه بتدعى والكل بيقولوا يا رب..
انا لسه مافقتش من الدهشه اللى مسكانى
ومخليه روحى طايرة زى ملايكه
مش لاقيين حدود للفرحه وهى شايله معاصى
مقهوره انها سيبانى وماشيه..
مع انى قلبى لسه بيدق وبيطنطط من الفرح
اكمنه كل السواد اللى جواه بيروح
والبياض اللى جواه اكنه لم كل غيوم السما
عشان تبقى النور اللى بمشى عليه...
زحليقة ذنب اخدتنى للميضه عشان اتوضى
اغسلنى من ذنوبى افتح طاقه جديده للنور
يمكن كل ملاك بيجينى يكتب انى كنت
ناوى التوبه..
اخدت بالك يا صاحبى لما نعست شويه
شفت انى مركب جناحين وطايروسط ملايكه
ماشيين يدلونى على البنت اللى كنت تملى اشوفها
ومش لاقيها ...
الله على اللى فى الجنه واللى مجهزة ربنا
لكل اللى بيستغفروا ويتوبوا ويصلوا على النبى..
الله لكل اللى هجر الدنيا واللى فيها
واتزف لبنات الحور...
الله على جبر الكسوروالرحمه من النور والملايكه
اللى بالغفران عليك بتدور
انا يا صاحبى خلاص نويت ما ارجعش
والدنيا بكل ما فيها ما تلزمش
القلب بقى زى الحديد والخوف جواه ما عدش
انا قلبى وحيد زى ليلة القدر وحيده وسط ليالى
بتكنس وتلم الناس التايهه عن طريقه...
خليك يا صاحبى عاشق الروح الهايمه اللى رايحه
متحنيه وعطرهاالصلاة على الحبيب..

شاركها في جوجل+

عن Unknown