شاعر العرب ( من ريف مصر )

شاعر العرب

( من ريف مصر )

تعالوا نرجع كده شويه
لجمال الخضره والميه
صباح نادى على ريفك
وضحكه جميله لصبيه

على شط الترعه هنغنى
لغروب الشمس مستنى
وسواقى دايره يابلادى
وريفك دا أساس فنى

وشجر طارح فى كل أوان
عليه بيغنى أبوقردان
صديق مخلص لفلاحك
على أرضه دليل عنوان

وحضن الارض فيها فاسى
وعرقى دليل فى إخلاصى
وبزور الخير فيكى مبدوره
عشان خيرى لأهلى وناسى

ونسمه حلوه معديه
ورغيف عيش وقلة ميه
بصللى الفرض كده ف وقته
وعلى الترعه مصليه

وتحت شجرة الصفصاف
نايم ممدود وعمرى ماخاف
ساعة قيلوله ف الضهريه
لافى فرشه ولاحتى لحاف

أنا راضى هنا بخيرى
وبخاف كمان على غيرى
وعلى الفطره أنا عايش
وفاسى هيه سلاح ميرى

شوية مش ولقمه هنيه
ومن طينى إيدى محنيه
وعمرى ماخوفت من الأمراض
وربى ساترها كده عليا

=================
الشاعر عيسى عبد الرؤوف

شاركها في جوجل+

عن الشاعر أشرف الهنداوى