المشاركات
"وجهة نظر".........كلمات محمود وحيد
جوة الطريق حبة حفر
وعلى الجناب متاريس
والضلمة حاضنة النهار
لابسالة توب إبليس
والبدر كان ضيه نكد
رغم إنه كشف الليل
ما سلمش م التدليس
حبة غيوم إتبعترت
غمت عيون فرحته
شوق سكته
حاول لكن ما قدرش
قام أعلن التفليس
ما هو غصب عنه
الشر" نبوته قوى"
على طول يكسر فى الهمم
وواخدها بالتوريث
"والموت"....
ما يعرفش الهزار
الجد عكًازة القوى
بينفذ المكتوب
ماسك فى إيده سبحته
وبيحصر الأنفاس
واللى عليه الدور
من دقته مسلوب
طال الطريق أو قصر
الحلم عوده إنكسر
والظلم عدًى مداه
فبقى الميزان مقلوب
والنية" ذى التوب"
اللى بلون الحليب
لو طالها عفن الهوى
على طول سوادها يبان
"يطلعلها" أنياب
تنهش فى جسد الحلم
وتغيًر العنوان
تبعد شطوط الفرح
والشمس منا تخاف
تسجن جمال ضيها
وتفرق الأحزان
فيضيق طريق اللقا
تخنقنا كلمة " منا"
نجرى نهد الحلم
ونعيش على اللى كان
1/7/2014
عن Unknown
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم