Mohamed Elalfy,,,الجبل العالى

Mohamed Elalfy

الجبل العالى
ازاى الجبل العالى
ينزاح يتهد
كان دايماً
بينى وبينى وبين الشياطين
اكبر سد.
وانا كنت صغير
كنت بخاف م العفاريت
وانا بلعب فى الرهبه
او سارح للغيط ف الضلمه
او بايت فوق المسطاح
كان يتخيل لى
لما ارقب ضل جريد النخل بيتحرك
عفاريت الدنيا بتتنطط
000
لكن
كان قلبى تقيل مطمن
صورتك ماشيه جوايه
ريحتك لما نقرب من بعض
كان متهىء لى
لما انده ياامى
هتردى عليه
000
وكبرت شويه
والدنيا رايحه وجايه
حتى وانا وسط النار
يوم 6 اكتوبر
والموت ارخص من طوب الأرض
كان متهىء لى
من اى مكان فى الدنيا
لما انده ياامى
هتردى عليه
000
لما جيت م لحرب
وبنينا البيت طوبه طوبه
يدى بيدك
كانت ايدك لسه عفيه
لما تميل الدنيا –تشد
كبروا عيالى وقالوا ياجده
وهواكى هو هوايه
لما تغيبى ادور عنك
واسأل طوب الأرض عليكى
لما القاكى ف ضل النخلة
والمغزل ف ايدك بيدور
اعرف انك لسه عفيه
000
بس عشيه
شفتك نايمه
ونفسك رايح جاى
بيخربش
والمغزل متلخبط خيطه
اول مره احس ف عمرى
ان الدنيا مايله عليه
سلامات والله شوية عليكى
سلامات ياامى ياضى عنيه

شاركها في جوجل+

عن Unknown