المشاركات
علي فرج
إنهضي
ــــــــــــــــــ
محتارة ليه يام الولاد الشقيانين
ــــــــــــــــــ
محتارة ليه يام الولاد الشقيانين
قومي ياغالية من ثباتك وانهضي
شايف في عينك دمعتين متحجرين
يالا امسحيهم واشهقي واتنهدي
قومي اخرجي من كتمة الليل الحزين
واتوضي ، صلي ركعتين واتعبدي
ومتنحنيش إلا لرب العالمين
واتوسلي له ، بحق عيسى وأحمدِ
قولي يارب ولادي ليه متفرقين ؟
ألف قلوبهم ، واجعل عاصيهم يتهدي
وبعدها روحي الكنيسة ،
دقي جرسها دقتين
خلي الجميع بتصرفاتك يهتدي
طول ما الهلال ويا الصليب متجمعين
عمر اللي برّة ماحد يقدر يعتدي
الكل مصري ، والدين لرب العالمين
طول عمرنا والكل بينا بيقتدي ...
،،،،،،،،،،،
هايبان نهارك ،، نادي بصوتك ندهتين
خلي البعيد ويا القريب يتندي
واصرخي ما بين جموعهم صرختين
وعلّي صوتك بين صفوفهم واجمدي
لابد يصحوا قبل ما تفوت السنين
صحّي الضماير تنتبه للمشهدِ
وفهّميهم احنا ليه وسط الطريق متكتّفين
وعرّفيهم ان احنا لازم نبتدي
وعشان منبدأ ، لازم نكون متوحّدين
أيد ربنا من فوق أيدينا تؤيدِ
صَفوا القلوب ، راح تكسبوا دنيا ودين
وطهروها عشان حاجتنا تتقضي
عمر النجاح ما يكون لناس متشتتين
أو أمنهم في أي لحظة مهددِ
شدوا السواعد ، والهمّة تبقى همّتين
وقولولي يامّه اتهني بينا واسعدي
وعلوا رايتي فوق رايات العالمين
مهو ده مكانها
وتاريخي أكبر شاهدِ
وساعتها هارجع تاني اصلي ركعتين
وادق أجراس الكنايس دقتين
بس النوبادي صلاتي حمدا للاله الواحدِ
والفرحة في قلبي هاتبقى فرحتين
والعين هاتذرف دمعتين !
بس النوبادي دموع فرح من غيرأنين
لما لقيت الكلمة طالعة من قلوبكم ،،
بتقول ياغالية إنهضي واتسيّدي !!
ــــــــــــــــــــ
بقم / علي فرج
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم