الشاعر ابو عمار المصري,,,,,,,,,,,,,حروف حياة

الشاعر ابو عمار المصري

‏

حروف حياة

أنا كنت باموت
والموت
سارح زى السرطان
أنا حاسس بيه
راسم سكة ف جسمى الميت أصلاً
ومحدد طرقات وحوارى
يوصل لوريد
يديى له تأشيرة لشريانى
تأشيرة دخول للموت
خروج للروح
والعين بتدور
من غير شوف
والصوت مبحوح
تخلص سكة
يفتح سكة
ويسيب علامات
على كل حروفى و أ شعارى
وبيكشف فيه المدارى
مات نصى الأول
وانا باضحك
مستنى خبر نصى التانى
والحلق اتزرعت كل غيطانه
بشجر السنط
بردان
غطانى بكفن الصمت
والصمغ اللى يبل الريق
والنبض الباقى المتعافى
بيحارب دم ف قلبى غريق
بيصارع ويعاند فى الموت
والجسم استسلم ومسلم
والحرف الباقى بيتكلم
يهمس لشفايفى
إفتكرينى
إقلعى جدر الموت من جسمى
خدى م الحى ف جوف البذرة
وبنقطة ما زالت هربانة
إبقى اروينى
والموت داير ورا نبضة
ونقطة مية وحرف
والباقى ف عقلى وف قلبى
ما بطَّل نزف
وما زال الحرف
بيلملم حرف وحرف
أول حرف وشايفاه عينى
وشفايفى دابت ويَّـاه
زرعوا الكلمة اللى بتحيينى
واترسَـمِـت بالنبض حياة
حرفى الأول
كان حرية
صحَّـى القلب وكسَّـر سِـجنه
والتانى يا شمس يا مصرية
إوعى تغيبى عن عينى ثانية
والتالت .أنا مصرى بجد
باهدّ الموت
على راس من زرعه
ما ابطَّـل هـّـد
وهادوس على كل جبان وخسيس
داس فى عنيكى ملامح حلمى
وانفجرت م الكلمة حياتى
والموت يهرب
كل ما حرف يفـَـرّع فيه
واترسمت فى طريقى حياتى
ثانية بثانية
حـَسِّـيت ان انا جيت الدنيا
لما لقيتك مستَـنيـَّة
بتسمى بقلبك
على قلبى وضى عنيَّـة
واخدة بإيدى هناك ويّـاكى
وانا اخطّـى أول خطاويّة
للحرية
................................
بـقـــلـــــم ا لـــشــــــا عــــــــر
أ بـــو عــــمــــــــا ر ا لـــمــــــصـــــــــــــر ى

شاركها في جوجل+

عن Unknown