حسن السحماوي@@@رغم الحريه .................

• 
  

حسن السحماوي

رغم الحريه
.........................
رغم الحريه ..
عصبت عنيه ..
وحجبت الضوء الشارد
عن عينى .. !!
وحلفت أعيش
معزول ..
عن كل الناس
حواليه ..
رغم الحريه ..
ربطت إدية فى رجليا
علشان مأثورش ..
فضلت أعيش .. وأنا متكتف .. !
بطلت أتكلم ..
ونسيت إن أنا إنسان ...
مولود بلسان ..
من كتر كلامه ..
علمنى أشاور
زى .. الخُرس
ونسيت إن أنا .. باتكلم
كل لغات العالم ..
من أول لغتى فى بلدى ..
ولحد لغات .. الفرس .. !
وأنا واد فهيم ..
بافهم فى أصول الحنيه ..
وأحس .. وأحب .. وأتألم ..
وأكره وأغير ... م الأنانية
رغم الحريه ..
من خوفى .. نفضت لحافى ..
ونكشت سريرى ..
علشان ماحلمش .. !
علشان الحلم الساكن
فى منامى ... مايجيش ..
ويحرر منى الروح المحبوسه
فى زنزانة .. جسمى
ويفك الحبس
ويشد الأمل النايم
جوايا سنين العمر ..
ويكسر كل قيود .. اليأس .. !
تتلهف روحى لنور الصبح
واخاف على روحى
لتشوف العكس .. ويشتد اليأس ..
رغم الحريه ..
حرية روحى .. من أول نبض القلب
فى صدرى ..
ولحد ما تتنفخ الرئتين ..
وتزج هواها لحد شفايفى .. وبس .. !!
تتنفس .. بس .. !!
وكفايا على الإحساس ..
إن أنا موجود ... بحدود ..
رغم الحريه ... !!
شعر .. حسن السحماوي ..
10/ 12 / 2014

شاركها في جوجل+

عن Unknown