الشاعر ابو عمار المصري,,,,,,,,كـُـنـتـُــم عــِــــــــزوتـى

الشاعر ابو عمار المصري

كـُـنـتـُــم عــِــــــــزوتـى

يا ولاد وريدى وشريانى
أيامى ليه متيتّـمة ؟
قلبى بينزف وعيونى 
تايهة ف خيالات العمى
رحمى الكبير ..
.جابكم على ضهر الحياه
وما كنتش اعرف إنكم
هتنقشوا بلون السـواد
على توبى لابيض على طرحتى
وتبقّـعوا لون فرحتى يا خـِلـفـِتى
كان صوتكوا واحد ...كان مسموع
ضاع صوتكوا ليه ومالوش صدى
والكـَفّ كان بيلـمكم ..
إتفرق ليه لخمسين كف ؟
والحلم كان واحد لكم لما اتـوَلد
دلوقتى أصبح ألف ألف
بيتنا الكبير وكان لاممنا
بتهدّوا حطانه وعمدانه على سكانه
البيت مش حيط ومغطّـيه سقف
دة البيت ناس
متعشّـقة وتتغطى بناس
دفا الضحكة
دفا الكلمة من قلب لقلب
دف أنفاس
وبيتنا كان بالنيّ لاخضر
والبنا كان فنان
يرُصّ الطوبة بالموال
منقوشة بعرق الأجيال
ولو بنيتوه بحجر صوان من غير أساس
راح تلقوه مال
كنت انا بتحامى ف عـِزوتكم
كان صوتكو ف جنبى
يحوش الخوف
الورد على جبينى بقى ضعيف
والشوك ما بقاش قلدر يحميه
فين الطريق خد خطاويكم ؟؟
مين غيرى كان بيربيكم ؟؟
ما تطبطبوش على كتافى
طبطبوا على جرحى ولمـّوه
سقياكم لما نشف ريقى
قلبى الأخضر نشّـفتوه
ما بقا ش فى صدرى ادّيكو تانى
نشف كبدى
دقّـوا البيبان المسكوكة
لمّـوا الجراح
قبل ما يتوه الصباح
قبل ما يضيع البراح
لمّـوا كفوفكم كف بكف
إكوى يا ولدى الجرح ف كبدى بجمرة نار
يمكن جرحى يبطـّل نزف
وارقد بسلام آخر مرة.....
..رقدة لاموات
أو رقدة ترد ف قلبى الروح
......................

بـقــلـــــــم ا لـــشــــــا عــــــــر
أ بـــــو عــــمـــــــا ر ا لــمـــصــــــــر ى

شاركها في جوجل+

عن Unknown