عوني هشام شاعر واعلامى@@@داير مع الداير

عوني هشام شاعر واعلامى

دايرة انتخابات عطعوط
=========== بقلم عونى هشام
داير مع الداير
نلفها دواير
شايل على اكتافى 
حجر كبير داير
-----------------
مكتوب عليه اسمى
مرسوم بخط الطيف
وعليه كمان رسمى
انا برضة رمز الكيف
-----------------------
الرمز دا رسمى
وحجرنا فى المظبوط
فى القهوة تلاقينى
قول بس فين عطعوط
-------------------------
معايا تموينك
سكر وزيت وصابون
مين غيرى هايعينك
تعالى خد لك بون
----------------------
تحلف على القرآن
انا عضو برلمان
ويوم تجيب صوتك
قرشين وباكو لبان
---------------------
عطعوط يا معلم
انت الكبير فينا
قرشك بقى يعلم
كلامك يدفينا
----------------
يا ناس حرام يا ناس
ليه الفقير ينداس
الحَوجة ليه مرة
وايد الغنى تنباس
-------------------
صوتك يا ابن الناس
تمنه يزيد فى الماس
يسجل تاريخ امه
وتبنى ليها اساس
---------------------
صوت الفقير فى غناه
الكل يتمناه
اياك تبعه فى يوم
هاتجرى تانى وراه
----------------------
عطعوط ما يهمك
فلوسه جاية منين
لا قرشة هايلمك
هاتضيع فى غمضة عين
--------------------
فكر معايا وقول
نحلم سوى لبكرا
بلاش كلام معسول
هيكون فى يوم ذكرى
----------------------
مصر دى امانه
ليك فيها وانا زيك
دى بهيه وبهانه
نورها من ضيك
--------------------
يا مصرى قوم واشتد
خلاص دخلنا الجد
ارجع لاصلك فوق
صوتك بسيفه حد
صوتك بسيفه حد
-------------------
\\\عونى هشام\\\
إعجاب ·

شاركها في جوجل+

عن Unknown