عونى هشام ........... بحبك ليه

عونى هشام 

 

 بحبك ليه

============== بقلم عونى هشام
بحبك اوى اوى من غير ليه
حبك فى قلبى قفلته عليه
كتير لامونى وهاعمل ايه
شغلتى فكرى وتهت انا فيه

لما تنادينى اسمعك
مكانك فى قلبى ومخدعك
كل الكلام من حبى فيكِ
لو غيبتى عنى ارَجَعَك
كريمة مين ينكر اصلك
بخيلة لأ لأ مش طبعك
كل اللى حبك يشفعلك
مهما يغيب راح يرجعلك
يا مصر حاكم فيك محكوم
عايزين رئيس ليكى ويدوم
نعلا ويعلا معاه القوم
ويجيب بطانه مافيهاش بوم
شبعنا بوم وزعيق غربان
ولا حَد شاف يوم الغلبان
نفسى اللى يِجِي يخاف ربه
ويحس لو نام يوم جوعان
عشنا وشفنا كتير ياما
خطاوينا تاهت يا ندامة
هنا انفجار وهناك تدمير
وعويل صراخ على موتانا
فى شرع مين تقتل اخونا
مسلم مسيحى يهمونا
الدين يحرم قتل اخوك
فاكرين بقتله تهزونا
ازمات فى شارع والحارة
راح الامان فين يا خسارة
والسير بعكس السيارة
فاكرينها دى تبقى شطارة
شاطر في ايه وبايه ما اعرفش
تعليم وصحة ما تسواش قرش
تِخرج عواطلى بشهادة
يفرض اتاوة ويعمل كرش
الكهربا عزيزة علينا
تيجى ساعة مش معقول
نور الشموع قام يعمينا
واضرب دماغك عرض وطول
اسعار وماحنش طايقينها
ليه بس يا اخوانى سايبينها
هو الفقير راح ياكل طوب
ولا انتوا يمكن عاملينها
يا رئيس وقبل ما تيجى تشوف
حالنا اصبح كده مكشوف
نفسى ان يوم راح احبك فيه
ما اندمش تانى وكلى كسوف
وبيحسدونى عليكى يا مصر
صبرك طوييييل ما يهمك عُسر
صابرة وشيلانا على ضهرك
حتى بهمومك عندك يسر
وبيلومونى بحيك ليه
حضنك كبير ودفاية انا فيه
لو جه فى يوم وشرب نيلك
يرجع يدور تانى عليه
ربك كريم كله بحكمة
زعلانه برضة ومبتسمة
طبع الرضا جوه جبينك
احنا القدر وانتى القسمة
يامصر فيكي امل وحياة
فيكي الحنان ومعاكي نجاة
اللي في يوم ينسي جمايلك
ملوش مكان واحنا هاننساه
==============
ملوش مكان واحنا هاننساه
عونى هشام

شاركها في جوجل+

عن بوسى كات