علاء فتحى بركات,,,,,,,,,,,,,,,,,,,,,,,,,,,كنت بستغرب زمان من الناس اللى بتنام فى الضلمة الكحل

علاء فتحى بركات

كنت بستغرب زمان من الناس اللى بتنام فى الضلمة الكحل
الضلمة اللى متشفش فيها حتى كف أيدك
الضلمة اللى فيها نفسك وخيالك وبس
الضلمة اللى فجأة تظهر فيها كل حاجة بعدت عنها

كنت بستغرب زمان من الناس اللى تقفل على نفسها الشباك والباب
ويفضلوا ساكتين بالساعات
من غير كلمة واحدة ينطقوا بيها
من غير مايحسوا فعلا
إنهم عايزين يتكلموا
أو حتى عايزين يشوفوا حد
كنت بستغرب زمان من الناس اللى يكونوا
وسط الناس والزحمة
وسط كلام الأصحاب
ودوشة الأفكار
يكونوا شاردين وتايهين
يكون عنيهم رافضه تشوف كل جديد
عنيهم مفتوحة للناس
للعرض
والأبتسامة
ومقفولة بينهم وبين نفسم بالقفل والترباس
كنت بستغرب زمان من الناس
اللى تكون ماشية فى الشارع
تسمع أغانى (تسمع قران
ترانيم
راديو
كتاب يحطوا السماعات فى ودنهم
ويرفضوا إنهم يسمعوا البنى أدمين
يعلوا الصوت
على العالى
على أعلى درجة فيها
ويمشوا يبصوا للسما وللسحاب
يمشوا يبصوا على الإعلانات
وترفض عينهم
تشوف عيون الناس
كنت بستغرب زمان من الناس
بس دلوقتى بستغرب على حالى
إنى بقيت زى اللى زمان
كنت بستغرب عليهم
وبقول إزاى هما كده عايشين فى عزلة
وساكتين طول الوقت

 

شاركها في جوجل+

عن Unknown