المشاركات
*** روح قلبى المنتظر***
____________________________________
لماقالولى انك
انت يا حبيبى وقلبك
على شوق مستنين
خدنى الهوى بشوقه
ف طريق حضن فوقه
صفصاف ع الصفين
ورقه بيميل على ورقه
كأنهم عارفين بيزفوا
مين على مين
داب الورد ف ايديه
ورموشى حضنت عنيا
حن الاسى على كفى
وداريت جوايا اسفى
بعد سلامك عليا
ما كدبتش خبر
انك يا حبيبى انت
روح قلبى المنتظر...
***
مشيت ما بين ظنون
وكلام جرّاح وعيون
ماسكين يا حبيبى سيرتى
كل اللى كان شاغلنى
لو ما كنتش هناك
اعمل يا حبيبى ايه
وانا راجعه ويا حيرتى
خلص الطريق ولقيتك
مستنى هناك ف بيتك
دافى كأنك لسه
سايب حضنى دلوقتى
قلت لى يا حياتى
هنا ف القلب عشك
تروحى بعيد وتجينى
وانا عارف قلبى واحشك
ف لحظه غمضت عينى
وما كدبتش خبر
انك يا حبيبى انت
روح قلبى المنتظر
***
ضمتنى وانت عارف
اللى جوايا ايه
ضعف وحيره وقلق
ونار ساكنه ف عواطفى
بس بدفاك وشوقك
دوبت تلج صيفى
هديت رعشة شفايفى
وعدى الوقت يجرى
ما اعرفش ازاى يا عمرى
لما الوقت يحاسبنا
هنقول يا حبيبى ايه
وف عز نشوتى
وشوقى وفرحتى
سمعتك بتنادينى
اما فتّحت عينى
لقيت يا حبيبى روحى
حاضنه مخدتى
ما كدبتش خبر
انك يا حبيبى انت
روح قلبى المنتظر ......
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم