المشاركات
الارهاب لا دين له
========= عونى هشام
هو دين ابوكم ايه
ربنا شاهد عليه
كله قتل وفيه خيانه
ما حد فيه ادى الامانه
فين اياته مين رسولكم
العدل لازم يوم يطولكم
القبر يوم هتعود اليه
هو دين ابوكم ايه
موسى كلم ربه واحنا
فى الكتاب شاهدين عليه
والمسيح شرف ضريحنا
والمحبه اَيه فيه
حتى يوسف جه بلادنا
قام قواعد زاد غلالنا
جات مجاعه رجعنا ليه
قول لى دين ابوكم ايه
علموكوا فى المدارس
تبقى يابنى شجاع وفارس
ولحدودك تبقى حارس
قمت واندرت عليهم
وهو حارس للحدود
وانت بتهد السدود
بأى ذنب قتلته ليه
قول لى دينكم يبقى ايه
كل دين وله قواعد
دين يقرب مش يباعد
يبنى نهضه يبقى واعد
وانت قاعد فى الجحور
ماش بتلم النذور
تصنع قنابل فيها وابل
تخرب اللى بنيته ليه
هو دين ابوكم ايه
شوف نبينا شوف شهامته
فى كل حرف تبان كرامته
واحنا نتباهى بسيرته
سيرته فيها م المحبه
كل يوم بنزيد احبه
كلامه وحى من الاله
وانت وحيك يبقى ايه
هو دين ابوكم ايه
قوم يا عاصى بالمعاصى
مين امامك وانت عاصى
الحساب هيبقى اَسى
ياما زودت ف ماَسى
كله متسجل ف راسى
استبحت الدم ليه
فى اى دين عرفنى بيه
قول لى دين ابوكم ايه
انتو جنس من الديابه
ماشى تنهش فى الغلابه
احنا مش عايشين ف غابه
وكل يوم بنزيد صلابه
دينا بيقول السلام
وانتوا ماشيين ف الظلام
ماشى تقتل بس ليه
هو دين ابوكم ايه
------------
عن الشاعر أشرف الهنداوى
0 التعليقات:
إرسال تعليق
دام الابداع والرقي فى التواجد نسعد دائماً بعطر تواجدكم