اصدقاء الاعزاء
موعدكم مع الصوره الغنائيه ومسلسل سعد وجمالات
كلمات الشاعر------------------- الشاعره
خالد الكردي ------------- مياده عبد العزيز
الحلقه الثالثه
سعد
جمالات انا رايح علي شغلي
وراح اتعشي معاكي الليله
عاوزك بقي يامراتي ياحلوه
تطبخي لية طبخه جميله
جمالات
انا تعبانه ياسعد شويه
مش هاقدر اطبخ زلا حاجه
هات لي معاك كام علبة كشري
والاكل كتير ف التلاجه
سعد
حاضر ماشي ياحبة عيني
بس حكايتك ايه ويايا
المصروف مش ها يكفيني
عشره جنيه بس اللي معايا
جمالات
انا كل ماباقولك حاجه
تعملهالي ياسعد حكايه
غور من وشي احسن اصوت
دانت بقيت شبه الحدايه
سعد
انا حدايه ياوش غراب
علشان باسال ع الاسباب
مصروفك فين بتوديه
اوعي تكوني بتاكلي كباب
جمالات
الله يلعن ام غبوتك
اما صحيح راجل كداب
مصروف ايه اللي يكفينا
علشان اكل انا بيه كباب
سعد
لمي لسانك بقي ياولية
واسمعي بقي راح اقولك ايه
المصروف اللي بتخديه
امسكس ايدك حبه عليه
جمالات
امسك ايدي ليه ياجعان
انا عايشه سنين ف الحرمان
كل ماباطلب منك حاجه
تتمسكن وتقول تعبان
سعد
ياولية اتلمي شويه
وشك نحس ياريتني ماشوفتك
بتقولي عايشه ف حرمان
الرزق بيهرب من وشك
جمالات
انا منحوسه ياوش السعد
ليه معيشني معاك ف عماره
دانت ياراجل وشك يقطع
العيش عن سكان الحاره
سعد
انتي غبيه وناكره الخير
وانا باتعب وباموت نفسي
بصي شويه لحال الغير
والله هاطقش من يأسي
جمالات
بص ياسعد شوف الاسعار
وابقي تعلي معايا اتكلم
كل الحاجه مولعه نار
بعد ما اموت بكرة هتتندم
سعد
الاسعار دي مطلعه عيني
لوحبيت اكل يوم محشي
المصروف مش هايكفيني
واخر الشهر ماباعرف امشي
جمالات
لولا اني باوفرلك حبه
ومربية عشربطاط
كنت هاقولك هات ياعينية
وانت هتزهق م الطلبات
سعد
اه ياحلاوتك ع التوفير
والله بحبك ياولية
وانا خايف بقي اني اتاخر
انا رايح الشغل علي عينيه
جمالات
طيب روح مع الف سلامه
وانا راح اقوم اعملك محشي
واتوصي بالشوربه شويه
علشان تغرق وماتطلعشي
تمت الحلقه الثالثه
مع تحيات الشاعر------------- الشاعره
خالد الكردي -------------- مياده عبد العزيز
المشاركات
