عاشور الزعيم *** انا و الليل فى ازمه***

عاشور الزعيم

*** انا و الليل فى ازمه***
_______________________________________
انا لسه ما دخلتش قلب الليل
اللى عايش فيه..
انا عجزت وهو مش عايز
يعمل دقة مرجله مع كل اصحابى
اللى بيسهروا معاه..
انا مين يعيشنى عمر
من غير سن
وياخدنى جوه قلوب الخلق
نلف ندَور على ضلة شجرة
لسه العتمه مغبتهاش
والعصفورتين بتوع ليلة امبارح
حاطين مناقيرهم فى بعض
زى اتنين عاشقين..
اول بيت فى الحاره الدور الارضى
بتستنانى سعاد والشوق فى عنيها
راسم طريق مرواحى ليها
بس لسه الليل اللى ها يحكى
حكاوى الحاره ما جاش..
متعتبش عليا يا صاحبى
انا والليل فى ازمه
السهره بتاعة امبارح
عملت شرخ جوايا بيسد
كل طريق للصبر
بيقتل كل عيال الفرح
خلّت بينى وبينه براح
بانه عمره
ما هيبقى راجل..
الليل دا يا ما كان بينى وبينه مواعيد
فى الاوضه بتاعتى كنا بنقعد
نوضب للسهره الجايه
اللى عمره ما صدق مره
وجه فيها معانا
مكنتش اعرف انه له اصحاب غيرى
وانى آخر واحد ممكن يفكر فيا..
آهى تلاكيك وكلام حواديت
بياخدونى فى شقوق العتمه
اللى ما بتخلصش
مع ان الليله هاديه
والقمر بيخطط لسهره
يحكيله حكاية سعاد اللى وقفت معاه تستنانى
واللى بتقرأ الكف قالت لها
انى مشغول...
ضحك الليل ساعتها وعدّل لياقة قميصه
مع اول ضوء للصبح راح ماشى
عرفت يا صاحبى ان الليل مش كله واحد
وان ليلى غير ليلك
وانه مش بس يا ما توهنى معاه
وانه كل يوم يجيلك بحدوته جديده
لسه معرفتهاش.....

إلغاء إعجابي

شاركها في جوجل+

عن Unknown